యువత క్రీడలు, దారుఢ్యానికి ప్రాధాన్యం ఇవ్వాలి: బీజేపీ నేత బుస్సాపూర్ శంకర్

నిజామాబాద్ నగరంలోని గుజరాతీ ఫంక్షన్ హాల్లో డీఎస్ ఆర్నాల్డ్ వ్యాయామశాల ఆధ్వర్యంలో 6వ వార్షిక బెంచ్ప్రెస్, డెడ్లిఫ్ట్ శక్తి క్రీడల పోటీలు శనివారం ఉత్సాహభరిత వాతావరణంలో నిర్వహించారు. ఈ కార్యక్రమానికి బుస్సాపూర్ శంకర్ ముఖ్య అతిథిగా హాజరై క్రీడాకారులను అభినందించారు. పోటీల సందర్భంగా బెంచ్ప్రెస్, డెడ్లిఫ్ట్ విభాగాల్లో పాల్గొని, క్రీడాకారులను ఉత్సాహపరిచారు.

ఫిట్నెస్ను జీవనశైలిలో భాగంగా చేసుకోవాలని యువతకు సూచించిన శంకర్, స్థానికంగా ఇలాంటి క్రీడా పోటీలు నిర్వహించడం ద్వారా ప్రతిభావంతులైన క్రీడాకారులకు తమ సామర్థ్యాలను ప్రదర్శించే అవకాశం లభిస్తుందని అన్నారు. ప్రతిభను గుర్తించి, తగిన ప్రోత్సాహం అందిస్తే మరింత మంది యువత క్రీడల వైపు ఆకర్షితులవుతారని పేర్కొన్నారు.

వివిధ విభాగాల్లో విజేతలు

పోటీల్లో వివిధ బరువు విభాగాలకు చెందిన క్రీడాకారులు ఉత్సాహంగా పాల్గొని, బెంచ్ప్రెస్, డెడ్లిఫ్ట్ విభాగాల్లో తమ శక్తిసామర్థ్యాలను ప్రదర్శించారు. 50 నుంచి 55 కిలోల విభాగంలో ఫర్హాన్ మస్తాన్ ప్రథమ స్థానం, ధీరజ్ ద్వితీయ, నితీష్ తృతీయ స్థానాల్లో నిలిచారు. 55 నుంచి 60 కిలోల విభాగంలో మొహమ్మద్ రియాన్ ప్రథమ, షేక్ అర్బాజ్ ద్వితీయ, ఖులంద్ అహ్మద్ తృతీయ స్థానాల్లో నిలిచారు.

60 నుంచి 65 కిలోల విభాగంలో మొహమ్మద్ ముబీన్ ప్రథమ, ముజాహిద్ ద్వితీయ, అన్సార్ అహ్మద్ తృతీయ స్థానాలను కైవసం చేసుకున్నారు. 70 నుంచి 75 కిలోల విభాగంలో షకీర్ ప్రథమ, గౌతమ్ ద్వితీయ స్థానాల్లో నిలిచారు.

షేక్ అర్బాజ్కు సమగ్ర విజయం

పలు విభాగాల్లో అత్యుత్తమ ప్రదర్శన కనబరిచిన షేక్ అర్బాజ్ సమగ్ర విజేతగా నిలిచారు. మొహమ్మద్ ముబీన్ ద్వితీయ స్థానాన్ని సాధించారు. సమగ్ర విజేతకు రూ.4,999 నగదు బహుమతిని అందజేశారు. విజేతలతో పాటు ప్రతిభ కనబరిచిన ఇతర క్రీడాకారులను నిర్వాహకులు, అతిథులు అభినందించారు.

ఈ కార్యక్రమంలో 27వ డివిజన్ కార్పొరేటర్ కల్పే చిరంజీవి, నవీన్ బహుళ వైద్యశాల వైద్యుడు నవీన్, విద్యుత్ శాఖ అధికారి బాబా శ్రీనివాస్, వాకర్స్ అధ్యక్షుడు పృథ్వీరాజ్, గణేష్ ఆలయ చైర్మన్ భూషణ్చారి, మురళీకృష్ణ, బీసీ సాధికార జిల్లా ఉపాధ్యక్షుడు పసుల లక్ష్మణ్, మోహన్ గైక్వాడ్ తదితరులు పాల్గొన్నారు.

పోటీలకు క్రీడాకారులు, యువత, శారీరక దారుఢ్యంపై ఆసక్తి ఉన్నవారి నుంచి విశేష స్పందన లభించడంపై డీఎస్ ఆర్నాల్డ్ వ్యాయామశాల నిర్వాహకుడు డిలోడ్ శేఖర్ హర్షం వ్యక్తం చేశారు. నిజామాబాద్ నగరంలో క్రీడా స్ఫూర్తిని మరింతగా ప్రోత్సహించే దిశగా భవిష్యత్తులో జిల్లా, రాష్ట్రస్థాయి పోటీలు నిర్వహించేందుకు కృషి చేస్తామని తెలిపారు.