ఎమ్మెల్యేకు ఎడ్లబండిపై ఘన స్వాగతం.. బొంద్రేడ్లో అభివృద్ధి పనులకు శ్రీకారం

రైతుల సమస్యల పరిష్కారానికి కృషి చేస్తున్న ఎమ్మెల్యే పవార్ రామారావు పటేల్కు మండలం బొంద్రేడ్ గ్రామస్థులు వినూత్న రీతిలో స్వాగతం పలికారు. ఎడ్లబండిపై ఎమ్మెల్యేను గ్రామంలోకి తీసుకొచ్చి ఘనంగా ఆహ్వానించారు. అనంతరం గ్రామంలో పలు అభివృద్ధి పనులకు భూమిపూజ, ప్రారంభోత్సవాలు నిర్వహించారు. మహిళా సమైక్య సంఘ భవన నిర్మాణానికి భూమిపూజ చేయగా, మండల పరిషత్ ప్రాథమిక పాఠశాల ప్రహరీని ప్రారంభించారు. రూ.21 లక్షల అంచనా వ్యయంతో చేపట్టనున్న సీసీ రోడ్లు, మురుగు కాలువల నిర్మాణ పనులకు భూమిపూజ చేశారు. ఈ సందర్భంగా గ్రామస్థుల నుంచి వచ్చిన పలు విజ్ఞప్తులను ఎమ్మెల్యే స్వీకరించారు. బొంద్రేడ్ నుంచి బోసి వరకు రహదారి నిర్మాణానికి కృషి చేస్తానని ఎమ్మెల్యే తెలిపారు. జాతీయ రహదారి 61 నుంచి హమ్రూసర్ గుట్ట వరకు రహదారి నిర్మాణాన్ని హామ్లో మంజూరు చేయించేందుకు చర్యలు తీసుకుంటానన్నారు. మండల రైతులకు కీలకమైన 28వ ప్యాకేజీ అంశాన్ని అసెంబ్లీలో పలుమార్లు ప్రస్తావిస్తానని చెప్పారు. ప్యాకేజీ అమలుతో మండలంలోని రైతులకు ప్రయోజనం చేకూరుతుందని పేర్కొన్నారు. రైతుల సంక్షేమంతో పాటు గ్రామాల అభివృద్ధికి ప్రాధాన్యం ఇస్తామని ఎమ్మెల్యే తెలిపారు. విద్య, వైద్యం, సాగునీరు, మౌలిక వసతుల కల్పనకు కృషి చేస్తానన్నారు. గత పాలకుల నిర్లక్ష్యంతో ముధోల్ నియోజకవర్గం అభివృద్ధిలో వెనుకబడిందని విమర్శించారు. ఇకపై నియోజకవర్గంలోని ప్రతి గ్రామాన్ని అభివృద్ధి పథంలో ముందుకు తీసుకెళ్లేందుకు కృషి చేస్తానన్నారు. అర్హులైన ప్రతి ఒక్కరికీ ఇందిరమ్మ ఇళ్లు, పింఛన్లు అందేలా చర్యలు తీసుకుంటామని హామీ ఇచ్చారు. అనంతరం ఇందిరమ్మ ఇళ్లకు సంబంధించిన మంజూరు పత్రాలను లబ్ధిదారులకు అందజేశారు. కార్యక్రమంలో సర్పంచులు, ప్రజాప్రతినిధులు, మండల సీనియర్ నాయకులు, అధికారులు, మహిళా సంఘాల సభ్యులు, రైతులు, గ్రామస్థులు పాల్గొన్నారు.