అడవుల్లో టేకు చెట్ల నరికివేత: అక్రమ రవాణాపై స్థానికుల ఆరోపణలు

నిర్మల్ అడవులను సంరక్షించాల్సిన అటవీశాఖ పర్యవేక్షణపై, అటవీ డివిజన్ పరిధిలో పలు ఆరోపణలు వినిపిస్తున్నాయి. కవ్వాల్ అటవీ ప్రాంతంలో భాగంగా ఉన్న డివిజన్ పరిధిలో విలువైన టేకు తదితర వృక్షాలను నరికివేస్తున్నారని స్థానికులు ఆరోపిస్తున్నారు. చెట్ల నరికివేతతో పాటు కలపను అక్రమంగా తరలిస్తున్నారనే అనుమానాలు వ్యక్తమవుతున్నాయి.

మండలంలోని సతనపల్లి అటవీ ప్రాంతంతో పాటు, సారంగాపూర్ సమీపంలోని అడవుల్లోనూ పెద్దఎత్తున చెట్ల నరికివేత జరుగుతున్నట్లు స్థానికులు చెబుతున్నారు. ఏర్వచింతల్ గ్రామ పరిధిలో టేకు చెట్ల నరికివేతకు సంబంధించిన ఆనవాళ్లు కనిపిస్తున్నాయని పేర్కొంటున్నారు. గ్రామాలకు సమీపంలోనే ఇలాంటి పరిస్థితి ఉన్నప్పటికీ సంబంధిత అధికారులు ఎందుకు చర్యలు తీసుకోవడం లేదని ప్రశ్నిస్తున్నారు.

అటవీ ప్రాంతాల్లో కొందరు అక్రమార్కులు యంత్రాల సాయంతో టేకు, తుమ్మ, వేప తదితర చెట్లను నరికివేసి, దుంగలుగా మార్చి ఇతర ప్రాంతాలకు తరలిస్తున్నారనే ఆరోపణలు ఉన్నాయి. మరికొన్ని ప్రాంతాల్లో అటవీ భూముల ఆక్రమణలు జరుగుతున్నాయనే విమర్శలు కూడా వినిపిస్తున్నాయి.

అటవీ సంపదను అక్రమంగా తరలించే వారిపై నిఘా పెంచి, కఠిన చర్యలు తీసుకోవాలని స్థానికులు కోరుతున్నారు. చెట్ల నరికివేత, కలప తరలింపుపై అటవీశాఖ ఉన్నతాధికారులు ప్రత్యేకంగా దృష్టి సారించి వాస్తవాలను వెలుగులోకి తేవాలని విజ్ఞప్తి చేస్తున్నారు.