జర్నలిస్టులపై నమోదైన కేసులను ఎత్తివేయాలి: దాదాన్నగారి విఠల్ రావు

నిజామాబాద్లో జర్నలిస్టులు బస్వరాజు, డి.ఎల్.ఎన్.చారిలపై నమోదైన కేసులు, అరెస్టులు, ఎఫ్ఐఆర్లు, రిమాండ్లను వెంటనే ఎత్తివేయాలని నిజామాబాద్ మాజీ జడ్పీ చైర్మన్, బీఆర్ఎస్ రాష్ట్ర కార్యదర్శి దాదాన్నగారి విఠల్ రావు ప్రభుత్వాన్ని, పోలీసు శాఖను డిమాండ్ చేశారు. ఈ సందర్భంగా ఆయన మాట్లాడుతూ.. ఉపాధి హామీ పథకంలో జరిగినట్లు ఆరోపణలున్న అవకతవకలపై ప్రజల్లో ఉన్న అభిప్రాయాలను బస్వరాజు తన పత్రికలో ప్రచురించినందుకే ఆయనపై కేసులు నమోదు చేశారని ఆరోపించారు. అలాగే, అక్రిడిటేషన్కు సంబంధించిన అంశంపై ప్రశ్నించినందుకు ప్రజా మీడియా స్థాపకుడు డి.ఎల్.ఎన్.చారిపై కేసు నమోదు చేయడం సరికాదని అన్నారు. ప్రభుత్వానికి, ప్రజలకు మధ్య వారధిగా మీడియా పనిచేస్తుందని విఠల్రావు పేర్కొన్నారు. ప్రజలకు తెలియని అంశాలను వార్తల ద్వారా వెలుగులోకి తీసుకురావడం పాత్రికేయుల బాధ్యత అని ఆయన అన్నారు. జర్నలిస్టులపై కేసులు నమోదు చేసే ముందు ఫిర్యాదుల్లోని అంశాలను పూర్తిగా పరిశీలించాలని కోరారు.