ముధోల్ మండల కేంద్రంలో ద్విచక్ర వాహనంపై నుంచి కిందపడి తీవ్రంగా గాయపడిన మాదేవ్ రాజుకు 108 సిబ్బంది సకాలంలో వైద్యం అందించారు. మార్గమధ్యంలో ప్రథమ చికిత్స చేసి, భైంసా ప్రభుత్వ ఆసుపత్రికి తరలించారు. బాధితుడి వద్ద లభించిన రూ.9,900 నగదును కూడా నిజాయితీగా పోలీసులకు అప్పగించారు.
ముధోల్ మండల కేంద్రంలోని రెసిడెన్షియల్ జూనియర్ కళాశాల సమీపంలో ద్విచక్ర వాహనంపై నుంచి ప్రమాదవశాత్తు కిందపడి మాదేవ్ రాజు తీవ్రంగా గాయపడ్డాడు. ఈ ఘటనను గమనించిన స్థానికులు వెంటనే 108 అత్యవసర సేవలకు సమాచారం అందించారు. సమాచారం అందుకున్న వెంటనే 108 సిబ్బంది ఈఎంటీ మాధవ్, వాహన చోదకుడు ఎస్. వెంకటేష్ సంఘటనా స్థలానికి చేరుకున్నారు.
రక్తస్రావంతో ఉన్న బాధితుడిని అంబులెన్స్లోకి చేర్చి, మార్గమధ్యంలోనే ప్రథమ చికిత్స అందించారు. అనంతరం భైంసా ప్రభుత్వ ప్రాంతీయ ఆసుపత్రికి తరలించి, సకాలంలో వైద్యం అందేలా చర్యలు తీసుకున్నారు.
బాధ్యతాయుతంగా వ్యవహరించిన 108 సిబ్బంది మానవత్వంతో పాటు నిజాయితీని కూడా చాటుకున్నారు. బాధితుడి వద్ద లభించిన రూ.9,900 నగదును భద్రంగా తీసుకెళ్లి, భైంసా ప్రభుత్వ ఆసుపత్రి ప్రాంగణంలో విధుల్లో ఉన్న పోలీసు అధికారులకు అప్పగించారు.
ఆపదలో ఉన్న వ్యక్తి ప్రాణాలు కాపాడటమే కాకుండా, ఆయన నగదును కూడా భద్రంగా అప్పగించిన 108 సిబ్బంది ఈఎంటీ మాధవ్, వాహన చోదకుడు వెంకటేష్లను స్థానికులు, గ్రామస్థులు అభినందించారు.
