మనోరంజని తెలుగు టైమ్స్: ఆదిలాబాద్ రిమ్స్ విషాదం - ముగ్గురు శిశువుల మృతి

రిమ్స్లోని ప్రత్యేక నవజాత శిశు సంరక్షణ విభాగంలో ఏసీ యూనిట్లలో పేలుళ్లు సంభవించడంతో మంటలు చెలరేగాయి. విద్యుత్ షార్ట్ సర్క్యూట్ కారణంగానే ఈ ప్రమాదం జరిగినట్లు ప్రాథమికంగా అధికారులు భావిస్తున్నారు. ఏసీ యూనిట్ల నుంచి వెలువడిన పొగ, విషపూరిత వాయువులు వార్డులో వ్యాపించడంతో అక్కడ చికిత్స పొందుతున్న శిశువులు తీవ్రంగా ప్రభావితమయ్యారు.

ఘటన సమయంలో సుమారు 30 మంది శిశువులు ఇంక్యుబేటర్లలో చికిత్స పొందుతున్నట్లు రిమ్స్ అధికారులు తెలిపారు. మంటలు, దట్టమైన పొగ వ్యాపించడంతో ఆసుపత్రి సిబ్బంది, అగ్నిమాపక, పోలీసు సిబ్బంది కలిసి శిశువులను సురక్షిత ప్రాంతాలకు తరలించారు.

ముగ్గురు చిన్నారుల మృతి

ప్రమాదం జరిగిన సమయంలోనే హైదరాబాద్కు చెందిన సలీం అహ్మద్కు చెందిన ఐదు రోజుల పసికందు మృతి చెందింది. మరో శిశువు మంగళవారం తెల్లవారుజామున ఆదిలాబాద్లోని ఓ ప్రైవేటు ఆసుపత్రిలో చికిత్స పొందుతూ మరణించింది. తాజాగా నిజామాబాద్ ప్రభుత్వ జనరల్ ఆసుపత్రిలో చికిత్స పొందుతున్న 20 రోజుల పాప కూడా మృతి చెందడంతో మృతుల సంఖ్య మూడుకు చేరింది.

మరో ఐదుగురు అస్వస్థత

విషపూరిత పొగ పీల్చుకోవడంతో మరో ఐదుగురు శిశువులు తీవ్రంగా అస్వస్థతకు గురయ్యారు. వీరిలో ముగ్గురు ప్రస్తుతం ఆదిలాబాద్లోని వేర్వేరు ప్రైవేటు ఆసుపత్రుల్లో చికిత్స పొందుతున్నారని, వారి పరిస్థితి విషమంగా ఉందని అధికారులు తెలిపారు. మిగిలిన శిశువుల ఆరోగ్య పరిస్థితి ప్రస్తుతం నిలకడగా ఉన్నట్లు సమాచారం.

విచారణకు ఆదేశం

ప్రమాదానికి అసలు కారణాలను గుర్తించేందుకు రిమ్స్ అధికారులు విచారణ ప్రారంభించారు. విద్యుత్ వ్యవస్థ, ఏసీ యూనిట్ల పరిస్థితి, అగ్నిమాపక భద్రతా ఏర్పాట్లు తదితర అంశాలను పరిశీలించనున్నారు. విధుల్లో నిర్లక్ష్యం జరిగినట్లు తేలితే సంబంధిత అధికారులపై చర్యలు తీసుకుంటామని అధికారులు వెల్లడించారు.

ఈ ఘటనపై తెలంగాణ ప్రభుత్వం కూడా స్పందించి, ప్రమాదానికి కారణాలను వెలికితీసేందుకు విచారణకు ఆదేశించింది. ఆసుపత్రుల్లో భద్రతా ప్రమాణాలను సమీక్షించాల్సిన అవసరాన్ని అధికారులు పరిశీలిస్తున్నారు.

రిమ్స్ నవజాత శిశు విభాగంలో జరిగిన ఈ ఘటనతో బాధిత కుటుంబాల్లో తీవ్ర విషాదం నెలకొంది. చికిత్స పొందుతున్న చిన్నారుల ఆరోగ్య పరిస్థితిని వైద్యులు నిరంతరం పర్యవేక్షిస్తున్నారు.