వేములవాడ సద్దుల బతుకమ్మ వేడుకలకు కలెక్టర్, ఎస్పీకి ఆహ్వానం

వేములవాడ పట్టణంలోని మూలవాగు బతుకమ్మ తెప్ప వద్ద శుక్రవారం సాయంత్రం నిర్వహించనున్న సద్దుల బతుకమ్మ వేడుకలకు జిల్లా కలెక్టర్ గరిమ అగర్వాల్, ఎస్పీ మహేష్ బి. గితే, అదనపు కలెక్టర్ నగేష్లను మున్సిపల్ చైర్మన్ పుల్కం రాజు, కౌన్సిలర్లతో కలిసి మర్యాదపూర్వకంగా ఆహ్వానించారు. ఈ సందర్భంగా అధికారులకు ఆహ్వాన పత్రాలను అందజేశారు.

ఆధ్యాత్మిక సంప్రదాయం

రాష్ట్రవ్యాప్తంగా తొమ్మిది రోజుల పాటు బతుకమ్మ సంబరాలు నిర్వహించడం ఆనవాయితీ కాగా, వేములవాడలో మాత్రం ఏడు రోజులకే సద్దుల బతుకమ్మ జరుపుకోవడం తరతరాలుగా వస్తున్న ఆధ్యాత్మిక సంప్రదాయమని చైర్మన్ పుల్కం రాజు కలెక్టర్కు వివరించారు.

అవసరమైన ఏర్పాట్లు

వేడుకలకు వేలాది మంది భక్తులు, మహిళలు హాజరయ్యే అవకాశం ఉన్నందున, తాగునీరు, విద్యుత్ దీపాలు, పారిశుధ్యం, భద్రతకు అవసరమైన ఏర్పాట్లు చేపట్టినట్లు తెలిపారు. ఈ కార్యక్రమంలో మున్సిపల్ వైస్ చైర్మన్ నరాల శేఖర్, కమిషనర్ లోకేష్, కౌన్సిలర్లు అన్నారం శ్రీనివాస్, కొక్కుల బాలకృష్ణ, ఏల శ్రీనివాస్, తోటరాజు, కొండ రాజశేఖర్, సంతోష కరుణాకర్, రామతీర్థపు కృష్ణవేణి పాల్గొన్నారు.