ఆదిలాబాద్ రిమ్స్ ఆసుపత్రి పిల్లల వార్డులో సోమవారం రాత్రి జరిగిన అగ్ని ప్రమాదం బాధితులను బీఆర్ఎస్ పార్టీ మహిళా బృందం పరామర్శించింది. మాజీ మంత్రి సత్యవతి రాథోడ్, ఎమ్మెల్యే కోవ లక్ష్మీ, తుల ఉమలతో కూడిన బృందం, స్థానిక ఎమ్మెల్యే అనిల్ జాదవ్, మాజీ మంత్రి జోగు రామన్నతో కలిసి ఆసుపత్రిని సందర్శించింది.
బీఆర్ఎస్ వర్కింగ్ ప్రెసిడెంట్ కేటీఆర్ ఆదేశాల మేరకు ఈ బృందం ఆదిలాబాద్ రిమ్స్ ఆసుపత్రికి చేరుకుంది. అక్కడ చికిత్స పొందుతున్న బాధితులను కలిసి, వారి ఆరోగ్య పరిస్థితిని అడిగి తెలుసుకున్నారు. బాధితులకు అందుతున్న వైద్య సేవలు, చికిత్స వివరాలను వైద్యులను అడిగి తెలుసుకున్నారు.
మెరుగైన వైద్యం అందించాలని సూచన
బాధితులకు మెరుగైన వైద్యం అందించాలని వైద్య సిబ్బందికి బీఆర్ఎస్ బృందం సూచించింది. ప్రమాద ఘటనకు సంబంధించిన పరిస్థితులను పరిశీలించి, బాధిత కుటుంబాలకు పార్టీ అండగా ఉంటుందని భరోసా ఇచ్చారు.
ప్రభుత్వంపై ఒత్తిడి తెస్తాం: ఎమ్మెల్యే అనిల్ జాదవ్
ఈ సందర్భంగా ఎమ్మెల్యే అనిల్ జాదవ్ మాట్లాడుతూ, రిమ్స్లో జరిగిన అగ్ని ప్రమాద ఘటన తీవ్ర ఆవేదనకు గురిచేసిందని తెలిపారు. బాధితుల కుటుంబాలకు బీఆర్ఎస్ పార్టీ అండగా ఉంటుందని, వారికి అవసరమైన సహాయ సహకారాలు అందేలా ప్రభుత్వంపై ఒత్తిడి తీసుకువస్తామని అన్నారు. ఆసుపత్రుల్లో భద్రతా ప్రమాణాల విషయంలో ఎలాంటి నిర్లక్ష్యానికి తావివ్వకూడదని ఆయన సూచించారు.
బాధితుల ప్రాణాలను కాపాడటమే ప్రభుత్వానికి మొదటి ప్రాధాన్యత కావాలని, భవిష్యత్తులో ఇలాంటి ఘటనలు పునరావృతం కాకుండా పటిష్టమైన చర్యలు తీసుకోవాలని ఎమ్మెల్యే డిమాండ్ చేశారు. ఈ కార్యక్రమంలో బీఆర్ఎస్ మహిళా నాయకులు, కార్యకర్తలు పాల్గొన్నారు.
