సూర్యాపేట జిల్లాలో చిట్టీల పేరుతో ప్రజలను మోసం చేసిన ప్రభుత్వ ఉపాధ్యాయుడు, కుటుంబంతో కలిసి రూ.10 కోట్లకు పైగా నగదుతో పరారైన ఘటన కలకలం రేపింది. బాధితులు జిల్లా ఎస్పీ నరసింహను కలిసి ఫిర్యాదు చేయడంతో ఈ భారీ మోసం వెలుగులోకి వచ్చింది.
మండలం ఏనేగండి తండాకు చెందిన, ఆత్మకూర్ (ఎస్) మండలం శెట్టిగూడెం పాఠశాలలో ఎస్జీటీగా పనిచేస్తున్న ఉపాధ్యాయుడు, సూర్యాపేటలోని విద్యానగర్లో అద్దె ఇంట్లో నివసిస్తూ గత ఆరేళ్లుగా చిట్టీల వ్యాపారం నిర్వహిస్తున్నాడు. తన సొంత తండాతో పాటు చుట్టుపక్కల 12 గ్రామాల్లోని ప్రజలు, బంధువులు, ఇతర ప్రభుత్వ ఉద్యోగుల వద్ద నమ్మకంగా ఉంటూ డబ్బులు వసూలు చేశాడు.
ఒక్కొక్కరి నుంచి రూ.లక్ష నుంచి రూ.1.30 కోట్ల వరకు వసూలు చేసినట్లు సమాచారం. కొందరికి ప్రామిసరీ నోట్లు రాసి ఇవ్వగా, మరికొందరికి నెలవారీగా అధిక లాభాలు ఇస్తానని నమ్మించాడు. ఇలా మొత్తం రూ.10 కోట్లకు పైగా సమీకరించాడు. అయితే, ఏడాదిగా డబ్బులు తిరిగి చెల్లించాలని బాధితులు ఒత్తిడి చేస్తుండటంతో వాయిదాలు వేస్తూ వచ్చాడు.
పరారయ్యేందుకు పక్కా ప్రణాళిక రచించిన నిందితుడు, తనకున్న 4 ఎకరాల భూమిలో ఎక్కువ భాగాన్ని ఇతరుల పేర్లపై రిజిస్ట్రేషన్ చేయించి, తన పేరిట కేవలం 13 గుంటలు మాత్రమే ఉంచుకున్నాడు. సుమారు పది రోజుల క్రితం, హైదరాబాద్లో ఓ ముఖ్యమైన వ్యక్తిని కలవాలని చెప్పి ఇద్దరు గ్రామస్థులను తనతో తీసుకెళ్లాడు.
హైదరాబాద్లోని ఓ హోటల్లో కూర్చుని తాను అప్పుల్లో కూరుకుపోయానని చెప్పి, ఇప్పుడే వస్తానని చెప్పి వెళ్లిపోయాడు. ఆ తర్వాత తిరిగి రాకపోవడంతో మోసపోయామని గ్రహించిన బాధితులు, సూర్యాపేట, ఏనేగండి తండాలోని అతడి ఇళ్లకు వెళ్లి చూడగా తాళాలు వేసి ఉన్నాయి.
బాధితుల ఫిర్యాదుతో పోలీసులు కేసు నమోదు చేసి దర్యాప్తు చేస్తున్నారు. నిందితుడు ఆ డబ్బును ఏం చేశాడనే కోణంలో విచారణ జరుపుతున్నారు. నిందితుడి ఆచూకీ కోసం గాలింపు చర్యలు ముమ్మరం చేశారు.
ఈ ఘటనపై బాధితులు మాట్లాడుతూ, అతను మా నమ్మకాన్ని వమ్ము చేశాడు. మా కష్టార్జితాన్ని దోచుకుని పారిపోయాడు. పోలీసులు అతన్ని పట్టుకుని మా డబ్బులు ఇప్పించాలి అని ఆవేదన వ్యక్తం చేశారు. ఈ మోసంపై మరింత సమాచారం సేకరిస్తున్నామని పోలీసులు తెలిపారు.
