అంతర్జాతీయ వృద్ధుల దినోత్సవాన్ని పురస్కరించుకుని జిల్లా రెడ్క్రాస్ సంఘం ఆధ్వర్యంలో జిల్లా కేంద్రంలోని శివగాయత్రి వృద్ధాశ్రమంలో ఉచిత వైద్య శిబిరం నిర్వహించారు. అదేవిధంగా, జాతీయ స్వచ్ఛంద రక్తదాన దినోత్సవాన్ని పురస్కరించుకుని ప్రభుత్వ ఆసుపత్రిలోని రక్తనిధి కేంద్రంలో రక్తదాన కార్యక్రమం చేపట్టారు.
జిల్లా రెడ్క్రాస్ సంఘం అధ్యక్షుడు డాక్టర్ ఆకుతోట శ్రీనివాస్రెడ్డి ఆధ్వర్యంలో వైద్యులు వృద్ధులకు వైద్య పరీక్షలు నిర్వహించారు. దంత వైద్యులు ఇనుగుర్తి రాజశేఖర్, చెవి, ముక్కు, గొంతు వైద్యులు డాక్టర్ శ్రవణ్, కంటి వైద్యులు రఘురాం వృద్ధులకు రక్తపరీక్షలు, రక్తంలో చక్కెర పరీక్షలు, గుండె విద్యుత్ పరీక్ష, కంటి చూపు, చెవి, ముక్కు, గొంతు సంబంధిత పరీక్షలు చేశారు. పరీక్షల్లో భాగంగా అవసరమైన వారికి ఉచితంగా మందులు అందజేశారు. అనంతరం రోజువారీ అవసరాలకు ఉపయోగపడే నిత్యావసర వస్తువులను కూడా పంపిణీ చేశారు. వృద్ధుల సంక్షేమానికి రెడ్క్రాస్ సంఘం చేస్తున్న కృషిని వృద్ధాశ్రమ నిర్వాహకులు అభినందించారు. ప్రభుత్వ ఆసుపత్రిలోని రక్తనిధి కేంద్రంలో నిర్వహించిన రక్తదాన కార్యక్రమంలో పలువురు స్వచ్ఛందంగా పాల్గొన్నారు. ప్రతి మూడు నెలలకు ఒకసారి రక్తదానం చేయవచ్చని, తద్వారా అవసరమైన వారికి ప్రాణదానం చేయవచ్చని నిర్వాహకులు తెలిపారు. రక్తం అవసరమైన సమయంలో కొరత లేకుండా ప్రజలు స్వచ్ఛందంగా రక్తదానానికి ముందుకు రావాలని వారు కోరారు. ఈ రక్తదాన కార్యక్రమం ద్వారా సేకరించిన రక్తాన్ని అవసరమైన వారికి అందిస్తామని తెలిపారు. ఈ కార్యక్రమాల్లో రెడ్క్రాస్ సంఘం ఉపాధ్యక్షురాలు భీమనాతిని ఉమ, రాష్ట్ర కార్యవర్గ సభ్యుడు సిరిసిల్ల శ్రీనివాస్, సభ్యులు చిత్తారి మధుకర్, సిరిపురం శ్రీనివాస్, గుండ సురేష్, వైద్యులు, రక్తనిధి కేంద్రం సిబ్బంది, వృద్ధాశ్రమం నిర్వాహకులు పాల్గొన్నారు.
