మనోరంజని తెలుగు టైమ్స్: లో ఏఐ పేటెంట్ శోధన: ఆవిష్కరణల గుర్తింపు ఇక సులభం

పేటెంట్లకు సంబంధించిన సమాచారాన్ని సులభంగా గుర్తించేందుకు ప్రపంచ మేధో సంపత్తి సంస్థ (డబ్ల్యూఐపీఓ) కృత్రిమ మేధ (ఏఐ) ఆధారిత కొత్త శోధన సదుపాయాన్ని అందుబాటులోకి తెచ్చింది. పేటెంట్ శోధన ప్రక్రియను మరింత సులభతరం చేయడమే లక్ష్యంగా ఈ సదుపాయాన్ని ప్రవేశపెట్టారు.

సహజ భాషలో శోధన సౌకర్యం

డబ్ల్యూఐపీఓకు చెందిన పేటెంట్స్కోప్ వేదికలో ఏఐ ఆధారిత శోధన సహాయక వ్యవస్థను అందుబాటులోకి తెచ్చారు. వినియోగదారులు తమకు కావాల్సిన పేటెంట్ వివరాలను సాధారణ భాషలో టైప్ చేస్తే, వాటిని విశ్లేషించి తగిన శోధన ప్రశ్నలను ఈ వ్యవస్థ రూపొందిస్తుంది. అవసరాన్ని బట్టి అదనపు సూచనలు ఇచ్చి శోధనను మరింత కచ్చితంగా మార్చుకోవచ్చు.

ఎలా పనిచేస్తుంది

ఉదాహరణకు, 2022 తర్వాత సౌర ఫలకాల సామర్థ్యాన్ని పెంచే సాంకేతికతకు సంబంధించిన పేటెంట్లు కావాలని వినియోగదారులు అడగవచ్చు. అలాగే ఎలక్ట్రిక్ కార్లపై చైనా పేటెంట్లు లేదా బ్యాటరీలతో పనిచేసే సైకిళ్లకు సంబంధించిన ఆవిష్కరణలను శోధించవచ్చు. వినియోగదారుల సూచనల ఆధారంగా కీలక పదాలు, ప్రచురణ తేదీలు, దేశాల కోడ్లను ఉపయోగించి శోధన ప్రశ్నలను ఏఐ సిద్ధం చేస్తుంది.

సమాచార గోప్యతకు పెద్దపీట

ఈ ఏఐ వ్యవస్థను డబ్ల్యూఐపీఓ పరిధిలోని సర్వర్లపైనే నిర్వహిస్తున్నారు. వినియోగదారులు ఇచ్చే శోధన వివరాలు గోప్యంగా ఉంటాయని సంస్థ వెల్లడించింది. శోధన కోసం డబ్ల్యూఐపీఓ ఖాతా తప్పనిసరి.

ప్రస్తుతం మొదటి వెర్షన్లో కీలక పదాలు, తేదీల పరిధి, దేశాల కోడ్ల ఆధారంగా శోధించే సదుపాయం ఉంది. భవిష్యత్తులో పేటెంట్ దరఖాస్తుదారులు, హక్కుదారుల పేర్లు, పేటెంట్ నంబర్లు, ప్రామాణిక సాంకేతిక పేటెంట్లకు సంబంధించిన శోధన సదుపాయాలను కూడా జోడించేందుకు ప్రణాళికలు రూపొందిస్తున్నారు.