ప్రపంచ రెజ్లింగ్ ఛాంపియన్షిప్లో మనీషా భన్వాలాకు స్వర్ణం.. మనోరంజని తెలుగు టైమ్స్ ప్రత్యేక కథనం

ఈ విజయంతో ప్రపంచ సీనియర్ రెజ్లింగ్ ఛాంపియన్షిప్లో స్వర్ణం సాధించిన తొలి భారత మహిళగా మనీషా చరిత్ర సృష్టించారు. ఫైనల్ పోరులో మనీషాకు ప్రారంభంలో గట్టి ఎదురుదెబ్బ తగిలింది. అమెరికా రెజ్లర్ అబిగైల్ నెట్టే వరుస పాయింట్లు సాధిస్తూ 6-0 ఆధిక్యంలోకి వెళ్లారు. ఈ దశలో మనీషా ఓటమి అంచున ఉన్నట్లు కనిపించినప్పటికీ పట్టువదల్లేదు. ప్రత్యర్థి దాడులను సమర్థంగా ఎదుర్కొంటూ క్రమంగా పుంజుకున్నారు. తొలుత ఒక పాయింట్ సాధించిన ఆమె, ఆ తర్వాత టేక్డౌన్ ద్వారా స్కోరును దగ్గర చేశారు. ప్రత్యర్థిపై నియంత్రణ సాధిస్తూ స్కోరును 6-6తో సమం చేశారు. చివరి దశలో మరో టేక్డౌన్ చేసి 8-6 ఆధిక్యంలోకి వెళ్లారు. చివరి వరకు ఆ ఆధిక్యాన్ని కాపాడుకుని స్వర్ణ పతకాన్ని సొంతం చేసుకున్నారు.

ప్రపంచ సీనియర్ రెజ్లింగ్ ఛాంపియన్షిప్లో ఇప్పటివరకు భారత మహిళలు స్వర్ణ పతకం సాధించలేదు. 2021లో అన్షు మాలిక్ రజత పతకంతో సరిపెట్టుకున్నారు. 2026 ఛాంపియన్షిప్లోనూ నీలం సిరోహి, కాజల్ ధోచక్ ఫైనల్ వరకు చేరినా రజత పతకాలతోనే ముగించారు. ఈ నేపథ్యంలో మనీషా సాధించిన స్వర్ణం భారత మహిళా రెజ్లింగ్కు చారిత్రక విజయంగా నిలిచింది. మొత్తంగా సీనియర్ ప్రపంచ ఛాంపియన్షిప్లో స్వర్ణం సాధించిన రెండో భారత రెజ్లర్గా కూడా మనీషా గుర్తింపు పొందారు. అంతకుముందు 2010లో సుశీల్ కుమార్ పురుషుల విభాగంలో ప్రపంచ టైటిల్ గెలిచారు. మనీషా భన్వాలా హరియాణాకు చెందిన జింద్ జిల్లాకు చెందిన సివాహా గ్రామంలో 1991లో జన్మించారు. చిన్నతనంలో శారీరక దృఢత్వం, బరువు నియంత్రణ కోసం కుస్తీ శిక్షణ ప్రారంభించారు. కాలక్రమంలో అదే ఆమెకు వృత్తిపరమైన క్రీడగా మారింది. రోహ్తక్లోని సర్ ఛోటూ రామ్ రెజ్లింగ్ అకాడమీలో శిక్షణ పొందారు. 2016లో క్యాడెట్ ప్రపంచ ఛాంపియన్షిప్లో స్వర్ణం సాధించి అంతర్జాతీయ స్థాయిలో గుర్తింపు పొందారు. అదే ఏడాది దక్షిణాసియా క్రీడల్లోనూ బంగారు పతకం గెలిచారు. 2018 ప్రపంచ మిలిటరీ క్రీడల్లో స్వర్ణం సాధించారు. 2022, 2023, 2024 ఆసియా ఛాంపియన్షిప్లలో కాంస్య పతకాలు సాధించగా, 2025 ఆసియా ఛాంపియన్షిప్లో స్వర్ణం గెలుచుకున్నారు.

మనీషా క్రీడా ప్రయాణంలో కుటుంబ ప్రోత్సాహం కీలకంగా నిలిచింది. ముఖ్యంగా ఆమె తండ్రి రెజ్లింగ్ వైపు అడుగులు వేయడానికి ప్రోత్సహించారు. అయితే 2022లో ఆసియా ఛాంపియన్షిప్లకు వెళ్లడానికి సిద్ధమవుతున్న సమయంలోనే తండ్రి మరణించారు. ఆ విషాదంతో కొంతకాలం రెజ్లింగ్కు దూరం కావాలని భావించినా కుటుంబ సభ్యులు ఆమెకు ధైర్యం చెప్పారు. తిరిగి పోటీల్లో పాల్గొని అదే ఏడాది ఆసియా ఛాంపియన్షిప్లో కాంస్య పతకం సాధించారు. ఇప్పుడు ప్రపంచ ఛాంపియన్గా నిలిచి తండ్రి ఆశయాన్ని నెరవేర్చారు. 2026 ప్రపంచ రెజ్లింగ్ ఛాంపియన్షిప్లో భారత మహిళల జట్టు మొత్తం నాలుగు పతకాలు సాధించింది. స్వర్ణం: మనీషా భన్వాలా 59 కిలోలు రజతం: కాజల్ ధోచక్ 76 కిలోలు రజతం: నీలం సిరోహి 50 కిలోలు కాంస్యం: తనూ శర్మ 72 కిలోలు