న్యూజిలాండ్తో ఐదు వన్డేల సిరీస్లో భాగంగా తొలి మ్యాచ్కు టీమిండియా సిద్ధమైంది. ఐదు టీ20ల సిరీస్ను గెలిచిన ఉత్సాహంతో వన్డేల్లోనూ అదే జోరు కొనసాగించాలని భారత జట్టు భావిస్తోంది. ఈ నేపథ్యంలో ఆక్లాండ్లోని ఈడెన్ పార్క్ వేదికగా జరిగే తొలి వన్డేపై ఆసక్తి నెలకొంది. సీనియర్ ఆటగాళ్లు రోహిత్ శర్మ, విరాట్ కోహ్లీ తిరిగి జట్టులోకి రావడంతో తుది జట్టు కూర్పుపై చర్చ జరుగుతోంది.
తొలి వన్డేలో కెప్టెన్ శుభ్మన్ గిల్తో కలిసి రోహిత్ శర్మ ఇన్నింగ్స్ ప్రారంభించే అవకాశం ఉంది. మూడో స్థానంలో విరాట్ కోహ్లీ బరిలోకి దిగవచ్చని అంచనా. నాలుగో స్థానానికి శ్రేయస్ అయ్యర్, రుతురాజ్ గైక్వాడ్ మధ్య పోటీ ఉండొచ్చు. వికెట్ కీపర్గా కేఎల్ రాహుల్కు అవకాశం దక్కే సూచనలు కనిపిస్తున్నాయి.
మధ్య వరుసలో నమన ధీర్కు చోటు దక్కవచ్చని భావిస్తున్నారు. ఆల్రౌండర్లుగా అక్షర్ పటేల్, నితీశ్ కుమార్ రెడ్డి జట్టుకు అదనపు బలాన్ని అందించనున్నారు.
బౌలింగ్ విభాగంలో పోటీ
బౌలింగ్లో కుల్దీప్ యాదవ్ స్పిన్ బాధ్యతలు చేపట్టే అవకాశం ఉంది. పేసర్లుగా మహమ్మద్ సిరాజ్, అర్ష్దీప్ సింగ్లకు చోటు దక్కవచ్చని అంచనా. మరో స్థానానికి గుర్నూర్ బ్రార్, అన్షుల్ కాంబోజ్, ఆకిబ్ నబీ మధ్య పోటీ ఉండొచ్చు. జట్టులో సమతుల్యతను బట్టి తుది ఎంపికలు మారే అవకాశం ఉంది.
అంచనా భారత జట్టు
1. రోహిత్ శర్మ 2. శుభ్మన్ గిల్ (కెప్టెన్) 3. విరాట్ కోహ్లీ 4. శ్రేయస్ అయ్యర్ 5. కేఎల్ రాహుల్ (వికెట్ కీపర్) 6. నమన ధీర్ 7. అక్షర్ పటేల్ 8. నితీశ్ కుమార్ రెడ్డి 9. కుల్దీప్ యాదవ్ 10. మహమ్మద్ సిరాజ్ 11. అర్ష్దీప్ సింగ్
గాయాలతో ఆటగాళ్లు దూరం
ఈ సిరీస్కు జస్ప్రీత్ బుమ్రాకు విశ్రాంతి ఇచ్చారు. హ్యామ్స్ట్రింగ్ గాయం నుంచి పూర్తిగా కోలుకోకపోవడంతో ప్రసిద్ధ్ కృష్ణకు జట్టులో చోటు దక్కలేదు. అతడి స్థానంలో తొలి మూడు వన్డేల కోసం ఆకిబ్ నబీని ఎంపిక చేశారు. మరోవైపు న్యూజిలాండ్ జట్టులో గాయాల కారణంగా రాచిన్ రవీంద్ర, మార్క్ చాప్మన్ సిరీస్కు దూరమయ్యారు.
భారత్, న్యూజిలాండ్ మధ్య తొలి వన్డే ఆక్లాండ్లోని ఈడెన్ పార్క్లో జరగనుంది. భారత కాలమానం ప్రకారం ఉదయం 7:30 గంటలకు మ్యాచ్ ప్రారంభం కానుంది. టాస్ ఉదయం 7 గంటలకు వేస్తారు. మ్యాచ్ ప్రత్యక్ష ప్రసారం సోనీ స్పోర్ట్స్ నెట్వర్క్లో, లైవ్ స్ట్రీమింగ్ సోనీలివ్ వేదికపై అందుబాటులో ఉంటుంది.
