నాయకుల పనితీరే కీలకం.. ఓటరు తీర్పు తప్పదు: రాజకీయ విశ్లేషణ

గంపలో కూరగాయలు కాదు.. నాయకుల పనితీరుపై చర్చ.. ప్రజలు ఒక నాయకుడి మాటను, మరొక నాయకుడి చేతలను, ఇంకొకరి రాజకీయ ప్రవర్తనను పోల్చి చూస్తున్నారు. గ్రామాల్లో టీ దుకాణం దగ్గర నుంచి.. రైతు బజార్ వరకు.. పల్లె పంచాయతీ నుంచి సోషల్ మీడియా వరకు.. ఎవరు ఏం చేశారు... ఎవరు ఏం చేయలేదు.. ఎవరు మాట నిలబెట్టుకున్నారు.. ఎవరు మాట తప్పారు. అనే చర్చ జరుగుతోంది. రాజకీయ నాయకులు అనుకోవచ్చు ఇది కేవలం ప్రత్యర్థుల ప్రచారం అని. కానీ ప్రజాస్వామ్యంలో ఒక విషయం మాత్రం మరిచిపోకూడదు. ప్రజల చర్చను ఎప్పటికీ చిన్నచూపు చూడలేరు. ఎందుకంటే ఆ చర్చ చివరికి ఓటు రూపంలో బయటపడుతుంది.

ప్రజా ధనం.. ప్రజల ప్రశ్న: ఎమ్మెల్యేలకు ప్రభుత్వం వేతనాలు, భత్యాలు, ఇతర సౌకర్యాలు కల్పిస్తుంది. అవి వ్యక్తిగత బహుమతులు కావు. ప్రజల పన్నుల రూపంలో సమకూరే ప్రజా ధనంతో నడిచే వ్యవస్థలో భాగం. అందుకే ప్రజాప్రతినిధిపై ప్రజలకు ప్రశ్నించే హక్కు ఉంది. మీరు నియోజకవర్గానికి ఏం చేశారు. అనే ప్రశ్న అడిగితే.. అది రాజకీయ కక్ష కాదు. అది ప్రజాస్వామ్య హక్కు. అలాగే విమర్శలు వచ్చినప్పుడు వాటిని వ్యక్తిగత అవమానంగా కాకుండా.. ప్రజల అసంతృప్తికి సంకేతంగా భావించి ఆత్మపరిశీలన చేసుకోవడం ప్రజాప్రతినిధుల బాధ్యత.

ఒకరిని పక్కన పెట్టారు.. మరొకరిని గమనిస్తున్నారు. గత ఎన్నికల్లో ప్రజలు ఇచ్చిన తీర్పు ఒక రాజకీయ సందేశాన్ని స్పష్టంగా ఇచ్చింది. అధికారంలో ఉన్న పార్టీ శాశ్వతం కాదు. ప్రతిపక్షంలో ఉన్న పార్టీ శాశ్వతంగా ప్రతిపక్షంలో ఉండదు. ప్రజలే అధికారం ఇస్తారు.. ప్రజలే అధికారం తీసుకుంటారు. ఇప్పటికే ఒక పార్టీ పాలనను ప్రజలు గమనించి తీర్పు ఇచ్చారు. ఇప్పుడు అధికారంలో ఉన్న వారి పనితీరును కూడా అదే ప్రజలు పరిశీలిస్తున్నారు. రేపు ఎవరి వైపు మొగ్గుతారో ఇప్పుడే చెప్పడం ఎవరికీ సాధ్యం కాదు. ఎందుకంటే ఓటరు మనసు.. రాజకీయ నాయకుడి అంచనాలకు అందని విధంగా ఉంటుంది.

ప్రచార యుద్ధం కాదు.. పనితీరు యుద్ధం కావాలి. కాంగ్రెస్, బీఆర్ఎస్, బీజేపీఏ పార్టీ అయినా ప్రజల ముందుకు రావాల్సింది ఒకే అంశంతో. మేమేం చేశాం.. అనే లెక్కతో. వాళ్లు ఏం చేయలేదు. అనే ఆరోపణలతో మాత్రమే కాదు. ప్రజలకు కావాల్సింది రాజకీయ తిట్లు కాదు. ప్రజలకు కావాల్సింది రోడ్లు, సాగునీరు, తాగునీరు, ఉద్యోగాలు, విద్య, వైద్యం, రైతు సంక్షేమం, మహిళల భద్రత, యువతకు అవకాశాలు, గ్రామాల అభివృద్ధి. అసెంబ్లీలో ఎవరు ఎవరిపై ఎంత గట్టిగా అరిచారన్నదానికంటే.. ప్రజల సమస్యపై ఎవరు ఎంత గట్టిగా మాట్లాడారు. అదే చరిత్రలో నిలిచిపోతుంది.

రేపటి తీర్పు.. నేటి పనితీరుపైనే... ప్రస్తుతం తెలంగాణ రాజకీయాల్లో అధికార పక్షంప్రతిపక్షాల మధ్య పోరాటం తీవ్రతరమవుతోంది. బీఆర్ఎస్ కాంగ్రెస్ ప్రభుత్వ 1,000 రోజుల పాలనను లక్ష్యంగా చేసుకుని కార్యక్రమాలు చేపట్టగా, బీజేపీ కూడా ఫీజు రీయింబర్స్మెంట్, రైతు సమస్యలు తదితర అంశాలపై ప్రభుత్వాన్ని ప్రశ్నిస్తోంది. అయితే ఈ రాజకీయ పోరాటాలన్నింటినీ తుది తీర్పుగా మార్చేది మాత్రం ప్రజల ఓటే.

ప్రజలు ఎవరి ప్రసంగాన్ని మెచ్చుకుంటారో కాదు.. ఎవరి పనిని మెచ్చుకుంటారో అదే ముఖ్యం. ఎవరి ప్రచారం పెద్దదో కాదు.. ఎవరి పనితీరు ప్రజల జీవితాల్లో మార్పు తెచ్చిందో అదే ముఖ్యం. ఎవరు ఎంత మంది జనాన్ని సభలకు తీసుకొచ్చారో కాదు.. ఎంత మంది ప్రజల గుండెల్లో స్థానం సంపాదించారో అదే అసలు రాజకీయ బలం. తెలంగాణ ప్రజలు రాజకీయ నాయకులను గంపలో పెట్టుకుని అమ్మడం లేదు. వారి మాటలను, చేతలను, హామీలను, పనితీరును ప్రజల ముందే తూకం వేస్తున్నారు.

ఈరోజు సోషల్ మీడియాలో ఒకరి వీడియో వైరల్ కావచ్చు. రేపు మరొకరి ప్రసంగం చర్చనీయాంశం కావచ్చు. కానీ ఎన్నికల రోజు మాత్రం.. వైరల్ వీడియోలు కాదు.. ఓటరు వేలిముద్రే చరిత్ర రాస్తుంది. అందుకే కాంగ్రెస్ అయినా.. బీఆర్ఎస్ అయినా.. బీజేపీ అయినా.. ప్రజల తీర్పును ముందుగానే అర్థం చేసుకోవాలి. ఎందుకంటే.. ప్రజలను ఐదేళ్లకు ఒకసారి కలిసే నాయకుడిని ప్రజలు గుర్తుంచుకోవచ్చు.. కానీ తమ సమస్యను పట్టించుకోని నాయకుడిని మాత్రం ఓటు వేసే రోజు తప్పకుండా గుర్తు పెట్టుకుంటారు. రాబోయే ఎన్నికల్లో ఎవరి రాజకీయ భవిష్యత్తుకు ప్రజలు పచ్చజెండా ఊపుతారు. ఎవరి రాజకీయ ప్రస్థానానికి బ్రేక్ వేస్తారు. ఆ తీర్పు రాజకీయ పార్టీల చేతుల్లో లేదు. ప్రజల చేతుల్లో ఉంది...

రాజకీయ పరిశోధన పాత్రికేయులు పర్కాల సమ్మయ్య గౌడ్: 8919849990: 9381114244: