ఎన్టీఆర్ జిల్లా మండలం కొటికలపూడి ఎంపీటీసీ స్థానంలో ఓట్ల లెక్కింపు సందర్భంగా తీవ్ర గందరగోళం నెలకొంది. పోలింగ్లో నమోదైన ఓట్లకు, బ్యాలెట్ బాక్సులో ఉన్న ఓట్లకు మధ్య ఐదు ఓట్ల తేడా కనిపించడంతో వైఎస్సార్సీపీ నాయకులు ఆందోళనకు దిగారు.
కొటికలపూడి ఎంపీటీసీ స్థానంలో జరిగిన పోలింగ్లో మొత్తం 2,432 ఓట్లు నమోదయ్యాయి. అయితే, ఓట్ల లెక్కింపు సమయంలో బ్యాలెట్ బాక్సులో 2,427 ఓట్లు మాత్రమే ఉన్నట్లు గుర్తించారు. ఈ ఐదు ఓట్ల తేడాపై వైఎస్సార్సీపీ నాయకులు తీవ్ర అభ్యంతరం వ్యక్తం చేశారు. ఎన్నికల ప్రక్రియలో అవకతవకలు జరుగుతున్నాయని ఆరోపిస్తూ వారు నిరసన తెలిపారు. ఈ క్రమంలో, తమను ప్రశ్నించడానికి వచ్చిన వైఎస్సార్సీపీ నాయకులను సీఐ సుబ్రమణ్యం అడ్డుకున్నారు. దీంతో అక్కడ పరిస్థితి ఉద్రిక్తంగా మారింది. నాయకులకు, పోలీసులకు మధ్య స్వల్ప వాగ్వాదం చోటుచేసుకుంది. ఈ సంఘటనతో ఎన్నికల ప్రక్రియపై అనుమానాలు వ్యక్తమవుతున్నాయి. ఎన్టీఆర్ జిల్లాలో మొత్తం 16 మండలాలకు సంబంధించి ఎంపీటీసీ, జడ్పీటీసీ ఎన్నికల ఓట్ల లెక్కింపు ప్రక్రియ జరుగుతోంది. ఇందుకోసం జిల్లావ్యాప్తంగా తొమ్మిది కేంద్రాలు, 18 కౌంటింగ్ హాళ్లు, 281 బల్లలు ఏర్పాటు చేసినట్లు అధికారులు తెలిపారు. కొటికలపూడిలో జరిగిన సంఘటనపై అధికారులు స్పష్టత ఇచ్చే అవకాశం ఉంది.
