ప్రపంచవ్యాప్తంగా కార్మిక సంఘాల పోరాటాలు: అసమానతలపై శ్రామికుల రణభేరి

యాపిల్, మైక్రోసాఫ్ట్, గూగుల్, అమెజాన్, ఎన్విడియా, మెటా వంటి ప్రపంచ ప్రసిద్ధి చెందిన ఎస్ అండ్ పి 500 దిగ్గజ కంపెనీలలో చీఫ్ ఎగ్జిక్యూటివ్ అధికారులు (సిఇఓ)-కార్మికుల వేతన నిష్పత్తి 2024లో 285:1 నుండి 2025లో 312:1 కి పెరిగిందని ఎగ్జిక్యూటివ్ పే వాచ్ నివేదిక చెబుతోంది. అంటే ఒక సిఇఓ ఒక్క రోజులో సంపాదించేది, సగటు అమెరికన్ కార్మికుడు ఏడాది పొడవునా రెక్కలు ముక్కలు చేసుకున్నా పొందలేకపోతున్నాడు. భారత దేశంలో ఈ వేతన వ్యత్యాసాలు మరింత ఎక్కువగా ఉన్నాయి. ఇన్ఫోసిస్ కంపెనీలో సిఇఓ వార్షిక వేతనం 80.6 కోట్ల రూపాయలు ఉండగా, ఉద్యోగి సగటు జీతం 10.72 లక్షల రూపాయలు. అంటే సిఇఓ వేతనం సాధారణ ఉద్యోగి కంటే 752 రెట్లు ఎక్కువ. ఈ తక్కువ వేతనాల ప్రభావం శ్రామిక కుటుంబాల ఆహార వినియోగం పైన, వారి ఆరోగ్యం పైన ప్రత్యక్షంగా ఉంటోంది.

వేతనాల క్షీణత నేరుగా శ్రామిక కుటుంబాల పౌష్టికాహారంపై, ఆరోగ్య వ్యవస్థపై తీవ్ర ప్రభావం చూపుతోంది. ఐక్యరాజ్యసమితి ఆహార భద్రత - పోషకాహార నివేదిక వెల్లడించిన వాస్తవాలు దిగ్భ్రాంతికరంగా ఉన్నాయి. ప్రపంచంలోని 269 కోట్ల మంది ప్రజలు (ప్రపంచ జనాభాలో 32.7 శాతం మంది) అంటే ప్రతీ ముగ్గురిలో ఒకరు ఆరోగ్యకరమైన ఆహారాన్ని పొందలేకపోతున్నారు. ఐదేళ్ల లోపు వయస్సు కలిగిన 15 కోట్ల మంది పిల్లలు ప్రొటీన్లు, అవసరమైన కొవ్వు, ఆమ్లాలు, ఇనుము, జింక్, విటమిన్ ఎ కొరత వల్ల ఎదుగుదల లోపంతో బాధపడుతున్నారు. 15 నుండి 49 సంవత్సరాల వయస్సుగల మహిళల్లో రక్తహీనత దాదాపు అన్ని ప్రాంతాలలో పెరుగుతోంది. భారతదేశంలో ఐదేళ్ల లోపు పిల్లలలో 35.5 శాతం మంది పిల్లలు తీవ్రమైన పౌష్టికాహార లేమి, ఎదుగుదల లోపంతో బాధపడుతున్నారు. 32.1 శాతం మంది పిల్లలు తక్కువ బరువును కలిగి ఉన్నారు. దేశంలోని 6 నెలల నుండి 5 ఏళ్ల లోపు పిల్లలలో 67.1 శాతం మంది రక్తహీనతతో బాధపడుతున్నారు. 15-49 ఏళ్ల వయస్సులోని 57 శాతం మంది మహిళలు, గర్భిణులలో 52.2 శాతం మంది ఇనుము, సూక్ష్మ పోషకాల లోపం వల్ల రక్తహీనతకు గురవుతున్నారు.

ఒకవైపు కోట్లాది మంది ప్రజలు ఆకలితో, పౌష్టికాహార లోపంతో అలమటిస్తుంటే, మరోవైపు ప్రపంచ దేశాలు యుద్ధ సమీకరణాల కోసం చేసే సైనిక వ్యయం రికార్డు స్థాయికి చేరుకుంటోంది. స్టాక్హోమ్ ఇంటర్నేషనల్ పీస్ రీసెర్చ్ ఇన్స్టిట్యూట్ (సిప్రి) నివేదిక ప్రకారం, ప్రపంచ సైనిక వ్యయం 2025లో రికార్డు స్థాయిలో 2,88,700 కోట్ల డాలర్లకు చేరుకుంది. అమెరికా ఒక్కటే 95,400 కోట్ల డాలర్లు ఖర్చు చేయగా, నాటో సభ్య దేశాలు కలిసి 1,58,109 కోట్ల డాలర్లు ఖర్చు చేశాయి. ప్రపంచంలో అత్యధిక సైనిక వ్యయం చేసే దేశాల జాబితాలో భారతదేశం నాల్గవ స్థానంలో ఉంది. సామ్రాజ్యవాదం తన ఆర్థిక ప్రయోజనాల కోసం సృష్టించే యుద్ధాలు, ఘర్షణల వల్ల దేశ సంపదలు నాశనమైపోవడమే కాక, సామాన్య ప్రజలు చనిపోతున్నారు. ప్రపంచ వ్యాపితంగా సైనిక వ్యయం పదో వంతు ఖర్చుతో తీవ్ర పేదరికాన్ని సమూలంగా నిర్మూలించవచ్చు. కానీ, ఆ పని చేయకుండా ఒక పక్క యుద్ధాలు, ఘర్షణలతోనూ, మరోపక్క ఆకలితోనూ శ్రామికుల ప్రాణాలు తీస్తున్నారు. పాలకులకు ప్రజా సంక్షేమం కంటే కార్పొరేట్ లాభాలే ముఖ్యం అన్నది దీన్నిబట్టే తెలుస్తోంది.