పట్టణ పారిశుధ్యంపై ప్రత్యేక దృష్టి సారించాలి

వేములవాడ పట్టణంలో పారిశుధ్య నిర్వహణను మరింత మెరుగుపరిచి, పరిశుభ్రమైన పట్టణంగా తీర్చిదిద్దేందుకు ప్రత్యేక చర్యలు చేపట్టాలని మున్సిపల్ చైర్మన్ పుల్కం రాజు సూచించారు. బుధవారం మున్సిపల్ కమిషనర్ లోకేష్ ఆధ్వర్యంలో పారిశుధ్య నిర్వహణపై సమీక్ష సమావేశం నిర్వహించారు. ఈ సమావేశంలో పారిశుధ్య తనిఖీ అధికారులు, వార్డు అధికారులు, సిబ్బంది పాల్గొన్నారు. ఈ సందర్భంగా పుల్కం రాజు మాట్లాడుతూ పట్టణంలోని ప్రతి వార్డులో ప్రతిరోజూ చెత్త సేకరణ సక్రమంగా జరిగేలా అధికారులు పర్యవేక్షించాలని సూచించారు. రహదారులు, మురుగు కాలువలు, బహిరంగ ప్రదేశాల్లో చెత్త పేరుకుపోకుండా చర్యలు తీసుకోవాలని తెలిపారు. పారిశుధ్య కార్మికులు విధుల పట్ల బాధ్యతగా వ్యవహరిస్తూ ప్రజలకు ఎలాంటి ఇబ్బందులు కలగకుండా చూడాలన్నారు.