నిర్మల్ జిల్లా, లోకేశ్వరం మండలం, కనకాపూర్ గ్రామంలో మున్నూరు కాపు సంఘం ఆధ్వర్యంలో బతుకమ్మ సంబరాలను ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సందర్భంగా, గ్రామంలోని ఆడపడుచులు ఉత్సాహంగా వేడుకల్లో పాల్గొన్నారు.
రంగురంగుల పూలతో అందంగా పేర్చిన బతుకమ్మల చుట్టూ చేరి, సంప్రదాయ బతుకమ్మ పాటలు పాడుతూ, ఆటపాటలతో సందడి చేశారు. తెలంగాణ ఆడపడుచుల ఆత్మీయతకు, ఐక్యతకు ప్రతీకగా నిలిచే బతుకమ్మ వేడుకలు గ్రామంలో పండుగ వాతావరణాన్ని నింపాయి.
మహిళలు సంప్రదాయ దుస్తులు ధరించి ఉత్సాహంగా పాల్గొనడంతో వేడుకలు మరింత కళకళలాడాయి. తెలంగాణ సంస్కృతి, సంప్రదాయాలను భావితరాలకు అందించడంతో పాటు, గ్రామంలో ఐక్యత, సోదరభావం పెంపొందించడంలో ఇటువంటి పండుగలు కీలక పాత్ర పోషిస్తాయని పలువురు పేర్కొన్నారు.
ఈ సందర్భంగా మున్నూరు కాపు సంఘం మాజీ అధ్యక్షులు దెబ్బడి భూమన్న, కనకాపూర్ గ్రామ ఆడపడుచులకు బతుకమ్మ పండుగ శుభాకాంక్షలు తెలిపారు. బతుకమ్మ పండుగ ప్రతి ఒక్కరి జీవితాల్లో సుఖసంతోషాలు, ఆయురారోగ్యాలు, సిరిసంపదలు నింపాలని ఆకాంక్షించారు.
