నిర్మల్ జిల్లా కుబీర్ మండలం సిరిపెల్లి హెచ్ గ్రామంలో కొలువుదీరిన శ్రీశ్రీశ్రీ మహాప్రసన్న జగత్ జనని జగదీశ్వరి దేవి సత్య కర్ర దుర్గామాత నవరాత్రి ఉత్సవాలు ఆదివారం భక్తిశ్రద్ధలతో ప్రారంభమయ్యాయి. గత 13 వసంతాలను పూర్తి చేసుకుని 14వ వసంతంలోకి అడుగుపెట్టిన అమ్మవారి దర్శనానికి వివిధ ప్రాంతాల నుంచి భక్తులు తరలివస్తున్నారు.
భక్తులు కోరిన కోరికలు తీర్చే కొంగుబంగారంగా సత్య కర్ర దుర్గామాత ప్రసిద్ధి చెందిందని గ్రామస్తులు పేర్కొంటున్నారు. అమ్మవారి ఆశీస్సులతో గ్రామంలో పాడిపంటలు సమృద్ధిగా పండాలని, ప్రజలందరూ సుఖసంతోషాలతో, ఆయురారోగ్యాలతో ఉండాలని భక్తులు ప్రార్థిస్తున్నారు.
నవరాత్రి ఉత్సవాల సందర్భంగా అమ్మవారిని దర్శించుకునేందుకు వివిధ ప్రాంతాల నుంచి భక్తులు తరలివచ్చి తమ మొక్కులు చెల్లించుకుంటున్నారు.
ఉత్సవాలకు వచ్చే భక్తులకు ఎలాంటి ఇబ్బందులు కలగకుండా గ్రామ యువత, గ్రామస్తుల ఆధ్వర్యంలో అవసరమైన సౌకర్యాలు కల్పిస్తున్నట్లు నిర్వాహకులు తెలిపారు.
గ్రామ ప్రజల భక్తివిశ్వాసాలకు ప్రతీకగా నిలుస్తున్న సత్య కర్ర దుర్గామాత నవరాత్రి ఉత్సవాలు సిరిపెల్లి హెచ్ గ్రామంలో ఆధ్యాత్మిక సందడిని నింపుతున్నాయి.
