పీఠికల సాహిత్య సంకలనం హృదయ పీఠిక ఆవిష్కరణ

ముందుమాటలకే ఒక సాహిత్య చిరునామాగా నిలిచే హృదయ పీఠిక అనే వినూత్న సాహిత్య సంకలనం వెలువడింది. ఇది కేవలం ముందుమాటల సంకలనం కాదని, ఒక సుదీర్ఘ సాహిత్య ప్రస్థానానికి అక్షర దర్పణమని సంపాదకులు డా. పెరుక రాజు అభివర్ణించారు. వివిధ సందర్భాల్లో వెలువడిన కవితా, కథా, వ్యాస గ్రంథాలకు సాహితీవేత్తలు రాసిన పీఠికలను ఒకేచోట చదివే అరుదైన అవకాశాన్ని ఈ గ్రంథం కల్పిస్తోందని ఆయన తెలిపారు.

1963లో నేటి రాజన్న జిల్లాలోని కొదురుపాకలో జన్మించిన డా. వైరాగ్యం ప్రభాకర్ విశ్రాంత ఉపాధ్యాయుడు. వృత్తికి విశ్రాంతి ఇచ్చినా అక్షరానికి విశ్రాంతి ఇవ్వలేదని, ఆయన తొలి రచన గులాబి కవితతో మొదలైన ప్రయాణం కవిత్వం, కథ, వ్యాసం, బాలసాహిత్యం, సంపాదకత్వం, గ్రంథ ప్రచురణ వంటి అనేక ప్రక్రియల్లో విస్తరించిందని డా. రాజు పేర్కొన్నారు. ఉద్యోగ విరమణ అనంతరం కూడా ఆయన కలం మరింత చురుగ్గా కదులుతోందని, అందుకే ఆయనది విశ్రాంత జీవితం కాదని, అవిశ్రాంత అక్షర జీవితమని అన్నారు.

తాను రాయడమే సాహిత్య సేవ అని ప్రభాకర్ భావించలేదని, ఇతరులలోని సృజనను గుర్తించడం, కొత్త కలాలను ప్రోత్సహించడం, రచనలను సేకరించి క్రోడీకరించడం, సంకలనాలుగా తీర్చిదిద్దడం ఆయన సాహిత్య వ్యక్తిత్వంలోని మరో విశిష్ట పార్శ్వమని డా. రాజు తెలిపారు. భవానీ సాహిత్య వేదిక ద్వారా అనేక సంకలనాలను వెలువరించి ఎందరో కవులు, రచయితలకు అక్షర వేదికను కల్పించారని చెప్పారు. తన కలంతో తాను ఎదగడం ఒక ఎత్తు అయితే, ఇతరుల కలాలకు చేయూతనిచ్చి వారిని వెలుగులోకి తీసుకురావడం మరో ఎత్తు అని, రచయితగా ఆయన ప్రతిభ అక్కడ కనిపిస్తే, సహృదయుడిగా ఆయన గొప్పతనం ఇక్కడ కనిపిస్తుందని అన్నారు.

హృదయ పీఠిక విశిష్టతను పలువురు సాహితీ ప్రముఖుల అభిప్రాయాలు మరింత బలపరుస్తాయని డా. రాజు తెలిపారు. డా. ఏనుగు నరసింహారెడ్డి దీనిని అపురూపమైనది, దాచుకోదగినదిగా పేర్కొన్నారని, బి.ఎస్. రాములు యువతరంలోని సృజనను వెలికితీసి సానబెట్టడానికి ప్రభాకర్ చేసిన కృషిని ఈ ముందుమాటలు తెలియజేస్తాయని అభిప్రాయపడ్డారని చెప్పారు. డా. రాచపాళెం చంద్రశేఖరరెడ్డి ఆయనలోని సాహిత్య సంస్కారాన్ని గుర్తించగా, ఆచార్య దార్ల వెంకటేశ్వరరావు ఉత్తమ సాహిత్యాన్ని ప్రజల ముందుకు తీసుకురావడానికి ఒక సైనికునిలా పనిచేసే కవిగా అభివర్ణించారని తెలిపారు.