కేంద్ర ఎన్నికల సంఘం ప్రధాన కమిషనర్ (సీఈసీ) జ్ఞానేష్ కుమార్ ఏకపక్ష వైఖరిని నిరసిస్తూ, ఆయన వెంటనే తన పదవికి రాజీనామా చేయాలని డిమాండ్ చేస్తూ జిల్లా కాంగ్రెస్ కమిటీ ఆధ్వర్యంలో భారీ నిరసన కార్యక్రమం నిర్వహించారు. ఖానాపూర్ ఎమ్మెల్యే వెడ్మ భోజ్జు పటేల్ నాయకత్వంలో జరిగిన ఈ కార్యక్రమంలో ముధోల్ మాజీ ఎమ్మెల్యే జి.విఠల్ రెడ్డి మద్దతు తెలిపారు.
ఏఐసీసీ, టీపీసీసీ పిలుపు మేరకు, టీపీసీసీ అధ్యక్షుడు బొమ్మ మహేష్ కుమార్ గౌడ్ ఆదేశాలతో ఈ నిరసన చేపట్టారు. డీసీసీ అధ్యక్షుడు, ఖానాపూర్ ఎమ్మెల్యే వెడ్మ భోజ్జు పటేల్ ఈ నిరసనకు నాయకత్వం వహించారు. ముధోల్ నియోజకవర్గ మాజీ శాసనసభ్యులు జి.విఠల్ రెడ్డి కూడా ఈ కార్యక్రమంలో పాల్గొని తమ మద్దతును తెలియజేశారు. ఈ సందర్భంగా ఖానాపూర్ ఎమ్మెల్యే వెడ్మ భోజ్జు పటేల్ మాట్లాడుతూ, ప్రజాస్వామ్యానికి మూలస్తంభమైన కేంద్ర ఎన్నికల సంఘం స్వతంత్రంగా వ్యవహరించకుండా, అధికార పక్షానికి అనుకూలంగా వ్యవహరిస్తూ రాజ్యాంగ వ్యవస్థల ఉనికిని ప్రశ్నార్థకంగా మారుస్తోందని తీవ్రంగా విమర్శించారు. చీఫ్ ఎలక్షన్ కమిషనర్ జ్ఞానేష్ కుమార్ ప్రజాస్వామ్య సూత్రాలను కాలరాస్తూ ఏకపక్ష నిర్ణయాలు తీసుకుంటున్నారని, ఆయన రాజ్యాంగబద్ధమైన పదవిలో కొనసాగే అర్హత కోల్పోయారని మండిపడ్డారు.
దేశంలో ప్రజాస్వామ్యాన్ని, రాజ్యాంగాన్ని పరిరక్షించడానికే ఈ పోరాటం చేపడుతున్నట్లు ఎమ్మెల్యే తెలిపారు. ఎన్నికల వ్యవస్థపై ప్రజలకు నమ్మకం కలిగేలా వివాదాస్పదంగా మారిన సీఈసీ జ్ఞానేష్ కుమార్ వెంటనే రాజీనామా చేయాలని ఆయన డిమాండ్ చేశారు. ఈ నిరసన కార్యక్రమంలో ముధోల్ నియోజకవర్గ మాజీ శాసనసభ్యులు జి.విఠల్ రెడ్డితో పాటు డీసీసీ ముఖ్య నాయకులు, వివిధ మండలాల కాంగ్రెస్ ప్రజాప్రతినిధులు, మండల పార్టీ అధ్యక్షులు, యువజన, విద్యార్థి, మహిళా విభాగాల నాయకులు, పెద్ద సంఖ్యలో కాంగ్రెస్ కార్యకర్తలు పాల్గొన్నారు.
