జైపూర్ సింగరేణి థర్మల్ ప్లాంట్ను సందర్శించిన బీఆర్ఎస్ బృందం

ఉమ్మడి జిల్లాకు చెందిన నాయకులతో కలిసి ఎమ్మెల్యే అనిల్ జాదవ్ ప్లాంట్ను పరిశీలించారు. విద్యుత్ ఉత్పత్తి, ప్లాంట్ నిర్వహణ, ప్రస్తుత పరిస్థితులను బీఆర్ఎస్ నాయకులు క్షుణ్ణంగా పరిశీలించారు.

ప్లాంట్లో ఉత్పత్తి నిలిచిపోవడానికి గల కారణాలను సిబ్బందిని అడిగి తెలుసుకున్నారు. పై అధికారుల ఆదేశాల మేరకే ఉత్పత్తిని నిలిపివేసినట్లు సిబ్బంది తెలిపారని ఎమ్మెల్యే అనిల్ జాదవ్ పేర్కొన్నారు.

ఈ సందర్భంగా ఎమ్మెల్యే అనిల్ జాదవ్ మాట్లాడుతూ, రాష్ట్ర ప్రయోజనాలు, ప్రజల ప్రయోజనాలకు సంబంధించిన అంశాలపై బీఆర్ఎస్ వాస్తవాలను ప్రజల ముందుకు తీసుకువస్తుందని అన్నారు. ప్రభుత్వ జోక్యం లేకుండా విద్యుత్ ఉత్పత్తికి సంబంధించిన కీలక నిర్ణయాలు ఎలా జరుగుతాయని ఆయన ప్రశ్నించారు. విద్యుత్ రంగ పరిరక్షణ కోసం తమ పోరాటం కొనసాగుతుందని తెలిపారు.

ప్రభుత్వ విధానాలపై విమర్శలు గుప్పించిన అనిల్ జాదవ్, చంద్రబాబు, రేవంత్రెడ్డిలపై రాజకీయ ఆరోపణలు చేశారు. చంద్రబాబుపై ఉన్న రాజకీయ కక్షతోనే రేవంత్రెడ్డి ప్రభుత్వం తెలంగాణ ప్రజలకు, రైతులకు ఇబ్బందులు కలిగిస్తోందని ఆయన ఆరోపించారు.

ఈ పర్యటనలో మాజీ మంత్రి జోగు రామన్న, మాజీ ఎమ్మెల్యేలు బాల్క సుమన్, దివాకర్రావు, దుర్గం చిన్నయ్య, కోనేరు కోనప్ప, ఎమ్మెల్యే కోవా లక్ష్మి, ఖానాపూర్ నియోజకవర్గ ఇన్ఛార్జి జాన్సన్ నాయక్ తదితరులు పాల్గొన్నారు.