యాచారం, 13 November
బలగం సినిమాలో ఒక ఆచారంలో భాగంగా కాకిని చూపించారు.
బలగం సినిమాలో ఒక ఆచారంలో భాగంగా కాకిని చూపించారు. అనేక పక్షులు ఉన్నప్పటికీ, కాకికి మాత్రం ప్రత్యేక గౌరవం దక్కింది. దీనికి కారణం కాకిని కాలజ్ఞానిగా భావించడమే.
వేకువ జామునే (బ్రహ్మ ముహూర్తంలో) మేల్కొని స్నానం ఆచరించే పక్షి కాకి. కావు కావు అంటూ ఈ బంధాలు, ఈ సిరి సంపదలు ఏవీ నీవి కావు, ఏవీ శాశ్వతమూ కావని అందరికీ గుర్తు చేస్తూ, బోధిస్తూ అందరినీ తట్టి లేపేది కాకి.
ఎక్కడైనా ఆహారం కనిపిస్తే అందుబాటులో ఉన్న అన్ని కాకులకు సందేశం పంపి, గుమిగూడి కలసి ఆహారం ఆరగిస్తాయి. అంత స్నేహపూర్వకంగా మసిలేది కాకి. శత్రువులను గుర్తించిన వెంటనే అన్ని కాకులకు సందేశం పంపి, సమీకరణలు చేసి సంఘటితంగా పోరాటం చేపట్టేవి కాకులు.
ఆడ కాకి, మగ కాకి కలవడం కూడా పరుల కంట పడకుండా ఎంతో గోప్యంగా జరుగుతుంది. అంత గుప్త జ్ఞానం కలిగి ఉండటం చెప్పదగ్గ విషయం. ఒక కాకి మరణిస్తే అన్ని కాకులు గుమిగూడి సంతాపం తెలియజేస్తూ, కాసేపు అరుస్తూ రోధించి, స్నానమాచరించి గూటికి చేరే మంచి ఆచరణ కాకులదే.
సూర్యాస్తమయం సమయానికి గూటికి చేరే సలక్షణమైన అలవాటు, సమయపాలన కాకులదే. అంతేకాదు, సూర్యాస్తమయం తరువాత ఆహారం ముట్టని సద్గుణం కూడా కాకులదే సుమా.
కాకులు లేని ప్రదేశం లేదు ఈ భువిపై. కాకి పళ్ళు తిని మరో చోట విసర్జన చేస్తే అక్కడ ఆ బీజం పడి మొలకెత్తి మొక్కలు పెరిగి వటవృక్షాలుగా పెరుగుతాయి. అలా పచ్చని ప్రకృతిని విస్తరించి పరిరక్షించుకోవడంలో కాకుల పాత్ర చాలా గణనీయమైనది. అందుకే కాకులు దూరని కారడవి అంటారు.
కాకులు అరుస్తోంటే ఎవరో కావలసిన బంధువులు వస్తారు కాబోలు, అందుకే కాకి అరుస్తోందని అనేవారు పెద్దలు. అంతేకాదు, ప్రకృతి వైపరీత్యాలు వచ్చే ముందు (భూమి కంపించే ముందు, తుఫానులు వచ్చే ముందు) కాకులు సూచన చేస్తూ, అరుస్తూ, ఎగురుతూ లోకానికి తెలియజేస్తాయి.
సూర్య గ్రహణం ఏర్పడిన సమయంలో కాకులు గూటికి చేరి, గ్రహణం విడిచాక స్నానమాచరించి బయటకు ఎగురుతాయి. అందుకే కాకిని కాలజ్ఞాని అంటారు.
దానధర్మాలు ఆచరించని వారిని, ఎంగిలి చేత్తో కాకిని తోలని వారిగా ఉదహరిస్తారు. భోజనం చేసే ముందు మొదటి ముద్ద బయట గోడపై పెట్టి కాకుల్ని పిలిచేవారు పెద్దలు.
మానవ జీవన పరిణామంలో కొన్ని తరాలను గుర్తు పెట్టుకునే సాక్షీభూతంగా ఉండే పక్షి కాకి. ఎక్కువ కాలం జీవిస్తుంది కనుక కాకి కలకాలం జీవించడం శాస్త్రంలో కూడా విశదీకరించారు.
కూజాలో రాళ్ళు వేసి అట్టడుగున ఉన్న నీటిని పైకి తెచ్చి దాహం తీర్చుకునే సాంకేతిక పరిజ్ఞానం కూడా కాకి సంతరించుకుంది.
భారతీయుల సనాతన ధర్మం, విశిష్టత, ఆవశ్యకత నేటి జనం ఆచరించాల్సినవే. సంఘజీవనం, సేవాతత్పరత, మంచి స్నేహభావాలతో, ఈర్ష్యా ద్వేషాలు లేకుండా, కలసి మెలసి అన్యోన్యంగా, అసమానతలకు అతీతమైన ప్రేమానురాగాలతో, నైతిక విలువలు కలిగి కాకిలా కలకాలం జీవిద్దాము.
