నటుడు ధనుష్ రాజకీయాల్లోకి వస్తారనే ప్రచారం నేపథ్యంలో నటి సాయి పల్లవి ఆసక్తికర వ్యాఖ్యలు చేశారు. ధనుష్ ఏ నిర్ణయం తీసుకున్నా తాను మద్దతు ఇస్తానని, అయితే విజయ్ లాగా సినిమాలకు దూరం కావద్దని కోరారు. ధనుష్ ఎప్పటికీ నటుడిగా ప్రేక్షకుల ముందే ఉండాలని దేవుడిని ప్రార్థిస్తున్నట్లు తెలిపారు.
ధనుష్, సాయి పల్లవి కలిసి నటించిన ఓం చాప్టర్ 1: ఉధిరం ది బ్లడ్ వుడ్ సినిమా ప్రీ రిలీజ్ వేడుక చెన్నైలో జరిగింది. ఈ కార్యక్రమానికి మలయాళ నటుడు మమ్ముట్టితో పాటు చిత్రబృందం హాజరైంది. ధనుష్ అభిమానులు పెద్ద సంఖ్యలో జెండాలతో రావడంతో అక్కడి వాతావరణం రాజకీయ సభను తలపిస్తోందని సాయి పల్లవి వ్యాఖ్యానించారు.
ఈ సందర్భంగా ధనుష్ను ఉద్దేశించి మాట్లాడుతూ, ఇటీవల విజయ్ రాజకీయాల్లోకి వచ్చి నటనకు దూరమయ్యారని గుర్తుచేశారు. ధనుష్ కూడా అదే నిర్ణయం తీసుకుంటారేమోనని భయంగా ఉందన్నారు. ఆయన ఎప్పటికీ సినిమాల్లో నటిస్తూ ప్రేక్షకులను అలరించాలని ఆకాంక్షించారు. సాయి పల్లవి వ్యాఖ్యలకు అభిమానుల నుంచి మంచి స్పందన వచ్చింది.
మరోవైపు తన రాజకీయ ప్రవేశంపై వస్తున్న ప్రచారానికి ధనుష్ స్పందించారు. తనను ఎవరో వెనుకుండి నడిపిస్తున్నారనే వార్తల్లో నిజం లేదని స్పష్టం చేశారు. తనను నడిపించేది దేవుడు మాత్రమేనని, తన వెనుక అభిమానులు ఉన్నారని, ప్రజలు తనకు అండగా ఉంటారని పేర్కొన్నారు. ప్రస్తుతం తన దృష్టి సినిమాలపైనే ఉందని వెల్లడించారు.
రాజ్కుమార్ పెరియసామి దర్శకత్వం వహిస్తున్న ఈ చిత్రంలో ధనుష్, సాయి పల్లవితో పాటు మమ్ముట్టి తదితరులు నటిస్తున్నారు. ధనుష్ నిర్మించిన ఈ చిత్రం త్వరలో ప్రేక్షకుల ముందుకు రానుంది.
