పోలీస్ అమరవీరుల సంస్మరణ దినోత్సవాన్ని పురస్కరించుకుని నిర్వహిస్తున్న పోలీస్ అవగాహన వారోత్సవాల్లో భాగంగా, ఎస్ఆర్ ప్రైమ్ డే అండ్ రెసిడెన్షియల్ క్యాంపస్ విద్యార్థులు నిర్మల్ రూరల్ పోలీస్ స్టేషన్ను సందర్శించారు. పోలీసుల విధులు, ప్రజల భద్రత, నేరాల నివారణ వంటి అంశాలపై వారు అవగాహన పొందారు.
ఈ సందర్భంగా సీఐ కృష్ణ, డీఎస్పీ శ్రీనివాస్, ఎస్ఐ జి. లింబాద్రి మరియు ఇతర పోలీస్ సిబ్బంది విద్యార్థులకు వివిధ రకాల తుపాకులు, వాటి వినియోగం, బాంబులను గుర్తించే పరికరాలు, నేరస్థులను గుర్తించి పట్టుకునే విధానాల గురించి వివరించారు.
అనంతరం విద్యార్థులు పోలీస్ కంట్రోల్ రూమ్ను సందర్శించి సీసీటీవీ కెమెరాల పర్యవేక్షణ, అత్యవసర పరిస్థితుల్లో పోలీసుల స్పందన, డయల్ 100 ద్వారా అందే ఫిర్యాదులపై తీసుకునే చర్యల గురించి తెలుసుకున్నారు.
రహదారి భద్రతపై అవగాహన కల్పిస్తూ, ముగ్గురు ఒకే ద్విచక్ర వాహనంపై ప్రయాణించకూడదని, హెల్మెట్ తప్పనిసరిగా ధరించాలని, చట్టబద్ధమైన వయస్సు రాకముందు వాహనాలు నడపకూడదని పోలీసులు సూచించారు.
అలాగే, విద్యార్థులు ధైర్యం, ఆత్మవిశ్వాసం, సమయస్ఫూర్తిని అలవర్చుకోవాలని, ప్రమాదకర పరిస్థితుల్లో ఎలా వ్యవహరించాలో తెలుసుకోవాలని, అవసరమైనప్పుడు భయపడకుండా పోలీసుల సహాయం కోరాలని సూచించారు.
ఈ కార్యక్రమం విద్యార్థులకు ఎంతో విజ్ఞానదాయకంగా నిలిచింది. ఇలాంటి అవగాహన కార్యక్రమాన్ని నిర్వహించి, విలువైన సూచనలు అందించిన పోలీస్ అధికారులకు, సిబ్బందికి పాఠశాల యాజమాన్యం కృతజ్ఞతలు తెలియజేసింది.
